ஆளும் கட்சியான அதிமுக தலைவி ஜெயலலிதா சமீபத்தில் நடந்த திருமண நிகழ்ச்சியில் எதிர்வரும் நாடாளுமன்றத் தேர்தலில் அதிமுக தனித்து நின்று 40 தொகுதிகளிலும் வெல்லும் என்று பேசினார் .எவ்வாறு இருந்தாலும் ,இறுதியில் ஜெயலலிதா கூட்டணி அமைப்பார் என்று இடதுசாரி கம்யூனிஸ்ட்கள் நம்பிக்கையோடு காத்து இருக்கின்றன .தேர்தல் முடிந்த பின் ,மோடி பிரதமர் வேட்பாளரானால் பிஜேபிக்கு ஜெயலலிதா ஆதரவு கொடுப்பார் என்று பிஜேபி நம்பிக்கையோடு இருக்கின்றது .அதிமுக கூட்டணி அமைத்தால் தேமுதிக ,புதிய தமிழகம் ஆகிய கட்சிகள் இடம் பெறாது என்பது உறுதியாகிவிட்டது .
எதிர்கட்சியான திமுகவோ மிக பலத்த யோசனையில் உள்ளது .எதிர்வரும் நாடாளுமன்றத்தேர்தலில் இலங்கை பிரச்சினை எதிரொலிக்குமா ? எதிரொலிக்காதா? என்பதுதான் திமுகவின் முக்கிய யோசனை ஆகிவிட்டது . காங்கிரசை விடுவதற்கு திமுக தலைமைக்கும் ,திமுகவை விட காங்கிரஸ் தலைமைக்கும் மனமில்லை .திமுக தலைமையில் திமுக ,காங்கிரஸ் ,விடுதலை சிறுத்தைகள் , இந்திய யூனியன் முஸ்லிம் லீக் மற்றும் புதிய தமிழகம் ஆகிய கட்சிகள் இணைந்து கூட்டணி அமைக்கும் என்றும் , இந்த கூட்டணியில் தேமுதிகவை சேர்க்க காங்கிரஸ் முயற்சிக்கின்றது என்றும்; எனவே ,திமுக தலைமையில் மெகா கூட்டணி அமையலாம் என்றும் அரசியல் யூகங்கள் அடிபடுகின்றன .
பாஜக தமிழகத்தில் தனது வாக்கு வங்கியை அதிகரிக்க தேமுதிகவை தனது பக்கம் இழுக்க பேரம் பேசிக்கொண்டுள்ளதாகவும் , தேமுதிகவோ தனது எதிர்காலத்தை கருத்தில் கொண்டு பாஜகவுடன் சேருவதற்கு விரும்பவில்லை என்றும் தேமுதிக அரசியல் வட்டாரங்களில் பேச்சு அடிபடுகிறது .
இந்த நிலையில் ஆளும் அதிமுக தலைமையில் கூட்டணி அமைந்தால் இரு கம்யூனிஸ்ட் கட்சிகளுக்கு தலா 2 சீட்டுகளை ஒதுக்கிவிட்டு மீதி 36 தொகுதிகளிலும் அதிமுக போட்டியிடுவதற்கு ஜெயலலிதா திட்டம் வைத்துள்ளதாக அதிமுக வட்டாரங்கள் கூறுகின்றன .
திமுக தலைமையிலான கூட்டணியில் தேமுதிக இடம் பெற்றால் காங்கிரசுக்கு 9 , தேமுதிக விற்கு 6 , இந்திய யூனியன் முஸ்லிம் லீக் மற்றும் விடுதலை சிறுத்தைகளுக்கு தலா 2 , புதிய தமிழகத்திற்கு 1 என்று கொடுத்து விட்டு மீதி 20 தொகுதிகளில் போட்டியிட திமுக திட்டம் போட்டுள்ளதாக திமுக வட்டாரங்களில் கூறப்படுகிறது .ஏனென்றால் ,திமுக 20 தொகுதிகளுக்கு மேல் போட்டியிட விரும்பவில்லை .
